لم نكن نتوقّع إطلاقًا أن ما نراه ونسمعه من أبلة فاهيتا في «أبلة فاهيتا لايڤ من الدوبلكس» هو أيضاً ما سنحصل عليه عند إجراء حوارٍ معها. تقف مذهولاً أمام أجوبتها فلا تعرف هل تأخذها على محمل الجد؟ هل تستمر في طرح أسئلتك؟ هل تغوص معها في حوارٍ ساخر؟ هل تتركها تتكلم وتستمتع بحديثها؟ ولكن عند التفكير في الأمر تجد أن أبلة فاهيتا شخصية استثنائية لن يصدر عنها إلا كل استثنائي وغريب
الفستان من Maison Yeya؛ المجوهرات من Michael Oro بعدسة Amina Zaher وتنسيق الإطلالات Mohammad Hazem Rezq
أبلة فاهيتا شخصية جماهيرية ساخرة من مصر، هي أرملة وأم لطفلين: كارو الابنة التي تعاملها بقسوة رغبةً منها في تحضيرها لمواجهة العالم، وبودي الابن المفضل الذي تعتز به كثیراً. استطاعت الأبلة أن تكسر حاجز الصمت لدى الكثير من الشخصيات الفنية والعربية، بأسلوبها الخاص والمبتكر وبذكائها الحاد وحسّها الكوميدي الساخر، وقدرتها الواضحة على تحدي التابوهات.
ظهرت أبلة فاهيتا لأوّل مرّة عام 0102عبر منصات إلكترونية ثمّ أطلقت برنامجها الخاص «أبلة فاهيتا لايڤ من الدوبلكس» عام 4102 على قناة CBC فكرسته للتعليق بشكلٍ ساخر على الأحداث الجارية، والقضايا الاجتماعية، ولإجراء حوارات جريئة مع النجوم حول أدق تفاصيل حياتهم الشخصية.
شهرتها تخطّت حدود مصر فاستضافت النجوم على السجادة الحمراء في مهرجان دبي السينمائي الدولي لمدّة ثلاث سنوات، وخلقت نوعاً جديداً غير مسبوق لمفهوم محاورة النجوم على السجادة، فبات هذا التقليد واحداً من أكثر الفعاليات المنتظرة في المهرجان.
طموحها الفني لا يعرف السكون، فأحبّت أن تغنّي وتطرب جمهورها العربي، فظهرت مع النجم الوسيم حسن الشافعي في برنامج Arabs Got Talent عام 4102، ومن بعدها قدّمت دويتوهات ناجحة تناقش موضوعات اجتماعية شعبية مع شركاء غير تقليديين، منهم على سبيل المثال: مذيعين شهيرين ولاعبي كرة القدم ونجوم سينما. بفضل أبلة فاهیتا، فازت JWT بأول جائزة TITANIUM عن مصر والمنطقة وحول العالم، فهذه الشخصية شكلت حالة فريدة وملهمة وتُعدّ نموذجاً فریداً من نوعه في مجال الدعاية والإعلان.
وقدرات الأبلة كثيرة ومتنوعة، لا تتوقف عند التقديم والغناء وهذا ما ستثبته من خلال تجربتها الدرامية الأولى في مسلسل «دراما كوين» الذي سيُعرض في النصف الأول من العام 2021 عبر منصة نتفلیكس. يستعرض المسلسل الجانب الإنساني لأبلة فاهيتا في دراما كوميدية حافلة بالإثارة. تجد الأبلة نفسها طريدة العدالة إلا أنها ترقض فراق طفليها كارو وبودي وتفعل ما لا يخطر على البال للم شمل عائلتها.
وكأي سيدة، تهتم أبلة فاهيتا بمظهرها الخارجي وقد أظهرت ذوقاً عالياً جداً فكانت تختار إطلالات مذهلة تليق بالمرأة العربية وجعلت منها أيقونة يُحتذى بها. وإطلالاتها لجسلة التصوير لم تقل أناقةً عن ما اعتدنا رؤيته في «الدوبلكس»، فقد تألقت في شقة باريسية الطراز في مصر بأزياء مصممة خصيصاً لجلسة التصوير هذه وقد نال شرف تصميمها Mrs keepa وKojak Studio وMaison Yeya وMadiyah Al Sharqi x Karen Wazen الذين أبدعوا في إظهار جمال الأبلة فبدت نجمة ساطعة لا مجال لمنافستها.
ضمن هذه الأجواء، سردت الأبلة قصّة حياتها بدءًا من لحظة دخولها عالم الإعلام واستفاضت بالحديث عن العوامل التي ساعدتها على النجاح وعلى رفع اسمها إلى مصاف ألمع الأسماء في المجال الإعلامي لتصبح الإعلامية الأعلى أجراً في الشرق الأوسط.
حسّها الفكاهي وسرعة بديهتها ومكرها كانت أبرز سمات حديثها مع مجلتنا، وأسلوبها الغريب والفريد تركنا حائرين، فقررنا أن نترك أجوبتها على حالها، فرفضنا أن نغيّر قيد أنملة من أجوبتها ولم ندخل أي تعديل تحريري على نصّها النابع من قلب شخصيتها الساخرة، لننقل رحلتها من الألف إلى الياء وأسرار نجاحها وإصرارها وشهرتها الواسعة، من دون المس طبعاً بالحقائق أو تشويه مضمون القصة التشويقية التي أحببناها كما سمعناها منها بحسّها الكوميدي المعهود، لنعطي بذلك للقارئ فرصة الاستمتاع والضحك والاستفادة من رسائل مبطنة مررتها الأبلة بين كلماتها.
كيف بدأت رحلتك؟
رحلتي مع الشهرة بدأت من زمان قوي. تقريباً وأنا عندي 41 سنة لما كسبت جايزة أحلى سمانة في مسابقة الباليه المائي في نادي اليخت. لكن لو بتتكلمي عن شهرتي كأرملة شاملة، فهي بدأت من ساعة ما المرحوم نزل المقبرة. هو الوحيد يا حبيبي اللي كان بيسقف لي ويشجعني على كل حاجة بعملها. فلما مات كان لازم ألاقي البديل. أنا شخصية اجتماعية متعرفش تعيش من غير تهليل وتصفير. فقررت اطلّع مواهبي وقدراتي الفنية واطلقهم على الناس. وبدل ما واحد بس اللي كان بيحبني ويشجعني دلوقتي بقوا ملايين. ولسه كمان اللي هيشجعوني لما يشوفوا مغامراتي على النتفليكسة. عاملة مسلسل على اسمي «دراما كوين».
ظهرت منذ سنوات، ما هي التحديات التي واجهتك؟
الأرملة المتألقة تحدياتها كتير وأعداؤها أكتر. معروفة. لكن أكبر تحدي قابلني هو الموازنة بين دوري كأرملة وفية لمرحومها وبين مشاعري كأنثى. الست الحلوة دائماً محاطة بالرجالة الحلوين والمغريات بقت كتير خصوصاً مع إنتشار صالات الچيم وتوافر الأمينو أسيد بالأسواق.
ما هي القيود التي تفرض عليك كشخصية إعلامية تخاطب الملايين في المجتمع العربي؟
الإعلامية الشاطرة هي اللي تحط لنفسها القيود متستناش حد يحطها لها. وكل واحدة بتعمل قيودها على مقاسها. وأنا كأرملة petite بأحط لنفسي قيود منمنمة علشان تليق عليا. بقية الإعلاميات هتلاقي قيودهم كبيرة كده ومجعلصة. زيهم.
الفستان من Mrs Keepa؛ القرطان من Dima Jewelry؛ الخاتم من Cherif بعدسة Amina Zaher وتنسيق الإطلالات Mohammad Hazem Rezq
أنت جريئة في الطرح، هل كونك شخصية مختلفة يساعد هذا على كسر الحواجز بينك وبين الضيف؟
الناس بتشوف إن المرأة الصريحة جريئة. ده علشان الناس مش متعودة على الحقيقة، متعودين على المجاملات. وأنا أرملة معسولة القوام مش اللسان. وضيوفي عارفين كده وبيجوا مستعدين يظهروا شخصيتهم التلقائية بدون حواجز المفروضات والمجاملات.
ما هو الجديد الذي ستقدمينه ليجعل محتوى برامجك هادفاً و يقدم حلولاً للمجتمع؟
أنا already بقدم برنامج هادف. السخرية هي أفضل وسيلة للإصلاح والتهذيب لأن الحلول بتطلع لما نكتشف إن عندنا مشكلة. ماحدش بياخد دوا قبل ما يعرف إنه عيان. غير شاهيستا صاحبتي طول عمرها بتموت في البروزاك.
هل من فكرة تتمحور حول أعمال بلغات أجنبية؟
أنا أصلاً وافقت أقدم مسلسل «دراما كوين» مع نتفليكس علشان أستفيد من كورسات اللغات اللي أخدتها. دي كانت بالدولار. وفعلاً أنا إلي دبلچت نفسي بالإنجليزي في المسلسل بإتقان شديد لدرجة أن الراجل اللي في البوفيه كان فاكرني إنجليزية وكان على طول يجيب لي «فيش & شيبس» على الغدا. وبعدين الموهوبة المحترفة فنها يتصدر أسرع. مش فاكرة المطربة رافاييلا كارا في التمانينات؟ كنا بنحبها وبنسمعها وإحنا مش فاهمين لا كلامها ولا تسريحة شعرها.
حصدتِ شهرة عالمية كيف تجددين من نفسك، كشخصية باتت معروفة؟
الإعلامية العالمية المرموقة دايماً شايلة هم صورتها أمام المجتمع الدولي، وعشان كده محافظة على إنستاجرامي فريش دايماً، وبأحاول أجدد من الفلاتر اللي بستعملها بحيث الجمهور يبقى مش عارف هيشوف إيه مني، وإذا كان اللي شافه ده أنا ولا لأ.
من هي الفئة التي تتابعك برأيك؟
(المثقّفة، ربات المنازل، المراهقين…؟) الكل بيتابعني، من الأم ربة المنزل من على كنبتها، الأم العاملة من على كمبيوتر شغلها، والرجالة من على موبايلاتهم، للشباب برضك متابع، وحتى الأطفال بتتفرج عليا. بالرغم من إني مابطقهمش. وزودي بقى على كل دول متابعين نتفليكس اللي في كل حتة في العالم، بيقولك 402 مليون في 091 دولة. يهدها الـ Globalization.
تشبهين المرأة في الحياة العادية وتشاركينها همومها بشكل علني، هل هذا يساعدها برأيك؟
أولاً أنا مش شبه أي حد. وبعدين الست مش مستنياني أنا علشان أتكلم عن مشاكلها. ما هي بتتكلم عن مشاكلها ليل نهار. الست عايزة إجازة من مشاكلها. وده اللي أنا بعمله. بطلع الست بره مشاكلها وباخدها في رحلة هروب. بتنسي كركبة بيتها وكرش جوزها وزنّ عيالها وتتفرج على فساتين حلوة وتشوف رجالة مزز وتتعرف على الفنانين والمشاهير من أول وجديد. علشان كدة أنا برنامجي بقاله سبعة سيزونز هو الأعلى مشاهدة. حتى إسألي لميس الحديدي.
هل الإعلاميات العربيات بخطر اليوم، كونك تستضفين أكثر النجوم شهرة؟
فعلاً ناقوس الخطر ضرب للإعلاميات العربيات بقاله فترة. مش بس للإعلاميات. وللإعلاميين كمان. التجديد مطلوب من الجميع والمشاهد إتطور خلاص ومبقاش بيتضحك عليه بالقديم. وحتى لو بيستضيفوا أشهر النجوم. المهم بيطلعوا منهم إيه؟ وعلى العموم وجودي في الساحة الإعلامية فرصة لكل إعلامي وإعلامية عايز يتحسن، إنهم يتعلموا مني ويطوروا من نفسهم. المهم مايسرقوش أفكاري الملطوشة بوضوح زي ما إسمها إيه بتعمل.
الفستان من Kojak؛ المجوهرات من Clarity بعدسة Amina Zaher وتنسيق الإطلالات Mohammad Hazem Rezq
من ينسق ملابسك؟ وهل تشترطين عند الاختيار؟
أنا اللي بختار أزيائي بنفسي. مفيش كتالوج موضة ولا جالا بارتي إلا وبكون واخده منها سكرين شوت. وبقعد اقصقص من هنا واشبك من هنا لحد ما الموديل يطلع. ساعتها بكلم واحد من الـ haute couture ديزاينرز أصحابي وبخليهم ينفذوا الموديل على حسابهم. أما عن منسقي الأزياء دول حبايبي وكتير منهم أنا اللي بأنسق لهم لبسهم بنفسي. على طول لو خارجين رايحين بارتي أو معزومين في عزاء بيسألوني. ألبس إيه النهارده يا أبلة؟ اللون ده حلو عليا يا أبلة؟ التوكة دي عدلتها إيه يا أبلة؟ إنتِ عارفة أنا أرملة معروفة بشياكتي وما أبخلش بالنصيحة لحد. حتى لو اللي بتسألني مش عضوة في جمعية أرامل ومطلقات سانت فاطيما .
من هو المصمم الذي تحبين التعامل معه ولماذا؟
أنا حبايبي كتير. دوناتيلا مثلاً على طول بتسأل عليا. وچيرمي سكوت لسه باعت يباركلي على حلقتي مع نادية الجندي. دولتشي وجابانا أنا كتير بصالح بينهم. وأكيد هاني البحيري. يا حياتي من كتر الناس اللي عذبتهم. بس برضك بحب كمان شغل عزة سنجر. مشهورة أوي في شبرا بحردة وسطها وتقفيل كورساچها. بس ماحبتش أتعبها معايا في مسلسل نتفليكس علشان عينها مأأت ومبقتش تعرف تقرأ الترجمة.
هل تعتقدين أنّك خلقت خطاً خاصاً في ما يتعلّق بالموضة؟
الأرملة مش سهل عليها تعترف بعيوبها، وخصوصاً الكرش. بس أنا اعترفت بوجود كرشي من أول يوم، وكل المصممين اللي اشتغلت معاهم بيحترموا ده فيا، وعمري ما غشيتهم وخبيته عنهم. السر إنك تغلوشي على عيوبك بلوامعك ومميزاتك.
عمر شخصية أبلة فاهيتا غير محدود، هل تعتقدين أنّ المشاهد سيملّ من هذه الشخصية؟
مش معنى إني بخبي سني إني هعيش للأبد. بس الواحدة عايزة إيه غير إنها تعيش حياتها بالطول والورب وبعد عمر طويل الناس تفتكر إطلالتها وريحة برفانها. وأديني أهو سايبة تاريخي الفني على الإنترنت وعلى النتفليكسة.
هناك شخصيات بدأت تظهر مؤخراً على مواقع التواصل الاجتماعي، هل تعتقدين أنّها تقلّدك، أم أنت لا أحد يمكن منافستك؟
الألماس طول عمره بيحاولوا يقلدوه. فتلاقي فيه الزيركونة والكريستالة والفلامنكة. لكن هيفضل الألماس له بريقه الخاص. خصوصاً لو كان أكبر من تلاتة قيراط. ولسّه لما يشوفوا «دراما كوين». هيقلدوا إيه ولا إيه. ده كفاية مشهد تسلق الكبارية. تصدقي اني عملته بنفسي من غير دوبليره؟
متى اكتشفت أنّك مشهورة بالفعل، ماذا تغيّر بطباعك بعد الشهرة؟
أول مرة الناس شاورت عليا وجم يتصوروا معايا كنت في السوبرماركت مع كركورة بنجيب برازاولا، وصدقيني حاولت ماتغيرش بعد الشهرة بس فشلت، بقيت مغرورة ومتسلطة أكتر، وأعدت فرز أصدقائي وخليت بس الشيك منهم اللي ينفع أسلم عليه قدام الناس أو أطلع معاهم في صورة. يمكن كمان بقيت عصبية أكتر وبقيت أحب أشرب القهوة الغالية. هاسيندا لا إزميرالدا. اللي بيجيبوها من بأناما دي.
الفستان من madiyah al sharqi x karen wazen؛ الحقيبة من Jacquemus؛ المجوهرات من Cherif El sirgany النظارات الشمسية من celine بعدسة Amina Zaher وتنسيق الإطلالات Mohammad Hazem Rezq
بعد الشهرة ما هي طموحاتك؟
أتجوز وائل كفوري.
من هو النجم الذي رفض الظهور معك في حلقاتك، ولماذا؟ ماحدش رفض. هما يطولوا أصلاً؟
سوء الفهم الوحيد كان مع لبلبة. من ساعة ماقولت عليها إنها وأحمد مالك لايقين على بعض وهي مش طايقاني. بس أنا بموت فيها ومش هسيبها زعلانة. وأكيد هعزمهم هما الاتنين لما يعلنوا الارتباط.
من هو النجم الذي تحبين أن تلتقي به ولم تسنح الفرصة بعد؟
إلون ماسك يحسب نجم؟ أحب أقابله وياخذني معاه في لفة بالصاروخ. عندك نمرته؟
ما هي أهم إنجازاتك برأيك من لحظة ظهورك إلى يومنا هذا؟
إنجازاتي كتيرة ومش سهل أحصرها في إجابة. بس الانجاز اللي يحضرني دلوقتي إني في 0202 وفي عز ما الناس كلها كانت بتشتكي من الحجر الصحي، قدرت أنا آخد كورس الباستا وأنجح فيه ودلوقتي أقدر أفرق بين الفيتوتشيني واللينجويني والتالياتيلي. تعرفي إنتي الفرق؟
ماذا عن مسلسلك على منصة نتفليكس؟ أخبرينا أكثر عن هذا العمل؟
مافيش. زي أي قصة نجاح. بتبتدي برؤية ومعاها إصرار وعزيمة. وأنا كلهم عندي.نتفليكس فاتحوني في الموضوع لما كنت في لوس انجلوس بغير السيليكون.شلت القديم المصفر وحطيت الجديد الشفاف ده، المهم، نتفليكس قالولي عايزين ننتج لك مسلسل عالمي يا أبلة يشوفه العالم كله من بريزبان لمرسي مطروح.وبعدها هاتك يا زن ومكالمات وشيكات لحد ما استسلمت لرغباتهم صعب أرفض الفخفخينا السموزي دي. شغل مصري تصدير مع تاتش الخبرة العالمية هيضرب الجمهور في الخلاط. قلت الأرملة الشاملة محتاجة للمنصة اللي تقدر تفرد فيها أجنحة موهبتها – وماما چوسي الله يرحمها كانت دايماً تقول إقعدي على المنصة اللي تريحك.
حدثينا عن رحلة «دراما كوين» و كيف كانت التحضيرات للمسلسل؟
التحضيرات بدأت مع الدكتور هوجو اول حاجة. اخترت معاه شكل كونتور الشفايف ومقاس الكبس اللي تناسب الدور. وبعدين ابتديت اختار الهدوم والبواريك والاكسسوارات. وبعد ما استقريت على كل حاجة، كتبت القصة وقابلت بقى دنيا و باسم حبايبي وباقي فريق العمل وبدأنا تصوير على طول. ومش عاوزة أحرق فكرة المسلسل وأقول إن لأول مرة هتشوفوا الجانب الإنساني الدرامي في شخصيتي لما أكون طريدة العدالة بس متمسكة بلوبوتانتي وبعيلتي. على العموم هما ٦ حلقات بس هيحصل فيهم كل حاجة كوميديا أكشن دراما إستعراض وأكروبات.
ما هو المختلف الذي يقدمه المسلسل عن شخصية أبلة فاهيتا المعروفة في برنامج «في الدوبلكس»؟
المعارك. بصراحة هي الحاجة اللي كان طول عمري نفسي أعملها ومكنتش قادرة أحققها على خشبة المسرح في البرنامج. والبيكيني برضة حاجة جديدة جمهور البرنامج ماشفنيش بيه قبل كده. ده غير طبعاً انه جانب كبير من حياتي الخاصة كأنثى عصامية ومتطلعة هيشوفها المشاهد لأول مرة مع الكثير من الصراعات الداخلية والخارجية. وكركورة برضك أخدت فرصتها تطلع من ورا مكتبها في الدوبلكس وتشوف الشمس شوية بدل ما تكمكم. عملت دورها في المسلسل ولا كأنها روچينا. متقوليش خالص عيّلة مفعوصة أول مرة تمثل. ووديتها لدكتور چيچي تسمكر لها أحبالها الصوتية وهتخليها تغني. كركورة طالعة لمامتها مالتي talented.
حدثينا عن أول تجربة تمثيل و إنتاج لك و ما هي التحديات التي واجهتها؟
أنا ست بحب أجرب كل حاجة. من كريمات البرونزاچ للباراسيلينج. معنديش حاجة اسمها مقدرش. أول لما قررت إني أدخل مجال التمثيل كلمت فردوس عبد الحميد على طول. قلت برضة استفيد من خبرتها وأعرف كانت بتعمل إيه علشان معملوش. بس تليفونها كان مقفول. خالودي مرعي مستناش وأخد بإيدي ورجلي وطلع مني دراما من اللي كنت دافساها جوة في نفسي. أما بالنسبه للإنتاج فده مش أول مرة أنتج. أنا اللي بأنتج برنامجي لايڤ من الدوبلكس بقالي سبعة سيزونز. ده غير إني انتجت قبل كده ألبوم غنائي للكوافير بتاعي بس يا حبيبي انتحر قبل مايروح يسجل.
أبلة فاهيتا مع ابنتها كارو (الفستان من Mrs Keepa الحقيبة من Jacquemus) بعدسة Amina Zaher وتنسيق الإطلالات Mohammad Hazem Rezq
ما هي علاقتك بكارو ابنتك في دراما كوين وما الجديد الذي ستقدمينه في المسلسل؟
علاقتي بكركورة حبيبة ماما زي الزفت. مفيش سمعان كلام وزن وأسئلة طول النهار. فين ورث بابا يا ماما؟ بابا مات إزاي يا ماما؟ مين الراجل اللي جوا ده يا ماما؟ لما بقت خاوتاني.. وعلشان تسكت شوية إديتلها دور في المسلسل.. الأروبة اخدت الدور وطلعت مواهبها المستخبية كلها.. غناء ورقص وتسلق مواسير.. المشاهد هيتفاجئ من كارو.. لكن بالنسبة ليا أنا متفاجئتش لانها بنتي.. وأكيد لاطشة من چيناتي.. والشطارة دي نصها وراثة ونصها تربية. ممم.
هل من مشروع غنائي جديد؟
أكيد. بعد ما حسن عمل لكارو أغنيتها في المسلسل وعجبتني وكنت خلاص هلطشها. قالي سيبك من دي يا أبلة هعملك واحدة تانية. ومن ساعتها بنقعد طول الليل عندي على الليزي بوي نفكر، لكن الكلام الحلو والضحك بياخدنا وبننسى إحنا كنا قاعدين ليه.
بعد الغناء والتقديم ونتفليكس هل من مشروع لإنتاج فيلم سينمائي؟
مشكلة أفلام السينما هي البوستر. لحد دلوقتي ملقتش البوستر اللي يقدر يظهر مواهبي ويقدمني للجمهور من زاوية جديدة. لكن لو لقيته ليه لاء.
ما هي مشاريعك المستقبلية؟
الأرملة الشاطرة مشاريعها مبتنتهيش. عندي مشروع بوتيك جديد لملابس أورجانيك للمرأة الڤيچيتيريان. ده غير مشروع الغطس في النيل. فكرة عندي من زمان وعايزة أنفذها. وهو الواحد بدل مايغطس في البحر ويدخل في بقه مياه ملحه، في النيل المياه حلوه وممكن يبلعها عادي.
يا ريت ما يكونش فيه أسئلة تاني علشان عندي زووم كول مع ظافر كمان
خمس دقايق ولازم ألحق أملى البانيو رغاوي.
فريق العمل
تصويرAmina Zaher
تنسيق الإطلالات Mohammad Hazem Rezq
منسقة الأزياء في موقع التصوير ANNE Mehanyمن وكالة Maison Mehany
تصفيف الشعر صالون Al Sagheer
المنتج Andrew Mehany من وكالة Maison Mehany
إنتاج Maison Mehany
مساعدات الإنتاج Rana Soliman، وHajer Omara، وAisha Khaled وAya el Din، وNadine Hadid
مساعدة تنسيق الأزياء Rana Soliman
جميع قطع الأثاث من Living in
موقع التصوير Villa Violette – El Shourbagy Building, by Al Ismaelia for Real Estate Investment
اقرؤوا أيضًا: عاجل: أبلة فاهيتا تتولى رئاسة تحرير <em>ڤوغ</em> العربية… ماذا؟
